Archive for diciembre, 2008
Nadal, nadal, nadal, …
Non é que me guste moito o nadal; a verdade é que cada vez menos. Pero si me gusta este video de LODV.
Vídeo do domingo
Déixovos o vídeo do acto de proclamación do domingo. E un resumo pero recoméndovolo.
É moito o que nos xunta
Non foi un acto calquera, foi o gran acto. Foi a proclamación!!. Fai varios anos que tiña gañas de abrir os dous auditorios do Palacio de Congresos para facer un mitin, sabía que as imaxes e a sensación ía a ser espectacular. E ao final puidemos facelo. Comentábame esta semana a Directora do Palacio, que ela cree que se abriron os dous auditorios nunha ocasión, fai xa moito tempo.
Fai unhas semanas que o PP fixo un acto no mesmo sitio, pero só no auditorio grande, e dixeron que meteran alí sete mil persoas. Que esaxerados!!, -por non dicir mentireiros-; xa que de ser así, nós entón, con todo o Palacio aberto, metemos dez mil persoas, aplicando a mesma proporción. Pero, escapando da guerra de cifras, porque iso é o de menos, este acto foi sobre todo espectacular: moita imaxe e colorido, moita música, moita xente e moi animada, e unha boa intervención de Emilio Pérez Touriño, que debullou os logros do seu goberno durante esta etapa de cambio que se desenvolveu en Galicia.
Hoxe é un deses días nos que un se sinte orgulloso do seu traballo, e dos compañeiros e compañeiras que ten. Como é habitual, na organización destes actos está moita xente, pero o éxito foi debido a persoas como Aceña, Luismi, Sergio, Tere, Rocio, Eloy, …, e como non, os camaradas da Rúa do Pino, os da O, que sempre están nos éxitos: Eva, Víctor, Diego, Castiñeiras, Marquiños, Chus, Cruz, Ánxela, Paula, Patricia, Xusto, …
É moito o que nos xunta, pero especialmente a ilusión, o traballo, o progreso e o cambio. Xa queda menos para as eleccións, e esta semana saberemos a data de celebración, e ata o «Día D» queda moito traballo e moitos quilómetros.
Podes ver máis fotos no Flickr
Domingo 14
O domingo 14, ás 12 horas terá lugar a proclamación de Emilio Pérez Touriño no Palacio de Congresos de Santiago. Este acto é o punto de partida, a saída cara as eleccións autonómicas que ten que consolidar ao Presidente Touriño ao fronte da Xunta de Galicia.
Este acto que imos a celebrar no Palacio de Congresos vai a ser un acto distinto, novidoso, orixinal, …, un acto ao que non podedes faltar.
Por certo, haberá autobuses e servizo de gardería.
Desde a Blackberry
O WordPress mudou o administrador, e o novo modelo é moito màis operativo e pràctico. O certo é que ata podo actualizar o blog desde a BlackBerry, sempre e cando non sexa un post moi longo, como é o caso. Que sorte!!, e canto avanzan os tempos e as tecnoloxías.
Mosbilízate contra a moción
Xa vos falei, e anticipei (grazas a Manuel Pombal) a moción de censura que o Partido Popular ía a poñer en Mos. E eu creo, que sempre que se produce un feito tan repugnante como este, intentar rematar cun goberno elixido polos cidadáns, grazas ao mercadeo de vontades (e votos), é dicir, a un indivíduo que se deixa mercar, e a un partido político que paga, non nos podemos quedar quietos, e temos que amosar alomenos o noso malestar.
Por tal motivo, invítovos á mobilización, tanto na rede como a asistir o vindeiro sábado 6 a Mos a amosar a vosa protesta en Mos.
Nunha carreiriña creei esta imaxe, que vos invito a poñer na vosa web e a escribir un post de rechazo a esta moción e a outras que se poidan producir. Ata o de agora en Galicia producíronse dúas mocións de censura con tránsfugas (Calvos de Randín e A Pobra de Trives), e as dúas auspiciadas polo Partido Popular con tránsfugas socialistas.
Sobre a moción de Mos vouvos a dar uns datos que amosan o estilo e a forma de actuar do Partido Popular e do seu presidente, tanto en Pontevedra como en Galicia:
Como podedes comprobar neste blog a moción de censura de Mos tiña data desde fai tempo, e a data non é por casualidade, senón para que coincidira con Núñez Feijoo fora de Galicia (de paseo por Arxentina) para así non ter que posicionarse sobre este tema, e intentar amosar que el non ten nada que ver.
A candidata á alcaldía de Mos é Nidia Arévalo, que foi deputada provincial na lexislatura pasada e na actualidade cargo de confianza do presidente da Deputación de Pontevedra e tamén do PP na mesma provincia, Rafael Louzán, ao que acompaña tamén como membro do comité executivo do Partido.
As declaracións do vicepresidente da Deputación de Pontevedra e vicepresidente do PP, Chema Figueroa, que lle dou cobertura argumental e «están lexitimados para gobernar o Concello de Mos”, dixo. Co cal defende e auspicia de xeito claro e manifesto a moción. Que se saiba polo de agora o PP aínda non desautorizou ao seu representante político.
Datos da concentración:
Sábado 6 ás 12:00 horas
Fronte ao Pavillón Óscar Pereiro
Petelos-Mos
Candidato a Presidente
A Executiva Nacional do PSdeG propuxo como candidato á presidencia da Xunta de Galicia a Emilio Pérez Touriño. A nova como tal, non é das que sorprende, posto que todos e todas sabiamos xa que Emilio ía a ser o candidato socialista.
Pero a nova si é un fito importante no proceso electoral que temos á porta. Se o Comité Nacional do PSdeG abría o proceso de selección de candidato o pasado venres, este luns a CENG da un paso máis e propón por unanimidade ao candidato, é dicir ao próximo presidente da Xunta, se os galegos e galegas así o queren.
Como dicía hoxe Mar Barcón na súa rolda de prensa: “é unha verdadeira honra presentar ante os galegos, non só o mellor proxecto de progreso social, senón tamén, o mellor candidato para seguir liderando o Goberno: Emilio Pérez Touriño”.
A carreira electoral xa empezou fai varios meses, e pouco a poucos os partidos políticos empezan a coller ritmo nesta competición, un ritmo que nos permita chegar con forzas ao último treito desta maratón e poder sprintar forte na liña de meta, aínda que a serán os galegos e as galegas os que decidirán na liña de meta quen queren que sexa o gañador.
Unha cousa é certa, o PSdeG está preparado para correr con todas as súas forzas, e estamos seguros de que somos a mellor opción para levar o triunfo, porque somos a forza de Galicia.
Comentarios